န၀လတ်၏ ဆေးတစ်ထုပ်

ပြဇာတ်တွင်ပါဝင်သရုပ်ဆောင်သူများ ..

မောင်ဒိုင်း - ဗမာဘလော့ဂါအဆော်ဆရာ အကျော်အမော်ကြီး။

နေနတ်နွယ် - အပစ်အခတ်၊ အညှစ်အသတ် .. အနက်နုရောင် ရုပ်ကြမ်းကြမ်း။ ခပ်လန်းလန်း မော်ဒန် ဇာတ်ညွှန်းရေးဆရာ/ မော်ဒန့် ဘိုးအေ ကဗျာကဝေ။

တော်ကီသော် - နာမည်ကြီး ပုဝါမကူရေမရှူ ဟစ်ဟော့သီဆိုသူ (Ywetsit Band)။

မောင်လူမော် (ရေတွင်းပျက်) - ရိုက်တိုင်းရ ရှုတိုင်းယဉ် အကယ်ဒမီ ဆုများရှင် မြန်မာ့ဟိုက်ပါ ဂျပုဒါရိုက်တာ။

စွန်းပုည၀ုကျိ - အဖြူရင့်ရင့် အဆင့်မြင့်၊ ဘလော့ဂါအရှင် သိုင်းသခင်။

ပြောင်ရှည် - ပြည်ထောင်စု ယိုင်နဲ့ရေးနှင့် ကြုံလှီဖွတ်တက်ရေး အဖွဲ့ချုပ်ကြီး၏ ငါဆို့ ငါမျို စစ်ပြုတ်ဘို၊ ငါရ .. ငါချ .. နာယက။

လျှာရှည် - ကိုယ့်ဘာသာခန့် ကိုယ်မတ်တပ်၊ ထောက်လှမ်းရေးပြုတ် အရှုပ်ထုပ်။


(ဇာတ်ခုံ အပြင်အဆင်ကို အင်းစိန်ထောင်၊ အဆောင် အမှတ် ဋ/(ဃ-ကဍ)၊ အခန်းနံပါတ် ၅၀-၅၀ ကဲ့သို့ မတူ တူအောင် စီစဉ်ထားစေ။ ၀ဲ ယာနှင့် အနောက်ဘက် မြင်ကွင်းကို အလုံ သစ်တောဝင်း ထဲရှိ စိနပြည် ပို့မည့် မှောင်ခိုသမားများ ထံမှ ပြန်လည်လုယူထားသော ပထမ တန်းစား ကျွန်းလုံးများဖြင့် အခိုင်အမာ ကာထားစေ။ အခန်း ဘယ်ဘက် ထောင့်တွင် တံခါးတစ်ခု ဖေါက်ထားပြီး ညာဘက်တွင်ကား သေးအိုးကြီးကြီး တစ်လုံးနှင့် ဗမာထိုင် အိမ်သာခုံ တစ်ခု ထားရှိစေ။ လုံခြုံရေးအရ အကျဉ်းထောင် ပြိုကွဲ ပျက်စီးစေမည့် ဘေးအန္တရာယ်မှ ကာကွယ် စောင့်ရှောက် နိုင်စေရန်၊ အိမ်သာကို အကာ တပ်မထားရ။ ဇာတ်ခုံ၏ အလယ်၊ အခန်းတွင်း၌ ခြကောင်များပင် တဂျွတ်ဂျွတ်ဝါး စားချင်စရာ ကောင်းလှသော သံကုတင် (၅) လုံးစီ၍ ချထားစေ။)

ကန့်လန့်ကာတင်စေ။

(အခန်းအလယ် တည့်တည့်ရှိ ကုတင်ပေါ်တွင် မောင်ဒိုင်း တစ်ယောက်တည်း ထိုင်ကာ ပါးစပ်မှ ပွစိပွစိ ရွတ်နေစေ။)

မောင်ဒိုင်း ။ ။ “ သြော် .. အနိစ္စ၊ ဒုက္ခ၊ အနတ္တ။ အင်း.. ဘလော့ဂင် အနိစ္စ၊ အင်းစိန် ဒုက္ခ၊ မောင်ဒိုင်း အနတ္တပါလား။ အေးလေ .. ဒီထဲ ကျတော့လည်း တစ်မျိုး ကောင်းတာဘဲ။ ဘီယာဖိုးတွေ အင်တာနက်ဖိုးတွေ မကုန်တော့ဘူးပေါ့။ ဒါပေမယ့် ငြီးတော့ အငွေ့သား။ ခါတိုင်း ဆို၊ ဟုတ် ဟုတ် မဟုတ်ဟုတ် စီဗုံးမှာ ဆော်လိုက်၊ ပို့စ်လေး ရေးတင်လိုက်နဲ့၊ ပြောင်လျှာရှည်တို့ လုပ်မှဘဲ ငါလည်း အင်းစိန် ရောက်တော့တယ်။ အင်း.. အနိစ္စ၊ ဒုက္ခ၊ အနတ္တ၊ … တစ်ခန်းရပ် ပြန်တော့.. တလွဲမသွေ ပြေးပြီလေလို့ ပြောကြပြန်ကော။ ရပ်မယ်လို့ စိတ်ချ၊ အိပ်မရတာလည်း များခဲ့ပေါ့။ ဒါနဲ့ပဲ ထောင်သက်ကရှည်၊ နောင်ဘ၀ဆက်မှာလေ ကျွန်တော်မောင်ဒိုင်း အင်္ဂလန်မှာပဲ ဘင်သံလေးနဲ့ ငြိမ့်ပရစေ ဗျာ .. ” လို့ တမ်းတရင်း ..

“ဂျိမ်း .. ” ဆိုတဲ့ အသံကြီး ကြားလိုက်ရမှ သတိပြန်ဝင်ပြီး လေပူတစ်ချက် မှုတ်ထုတ်လိုက်တယ် (ဖင်ထဲကပေါ့)။ ပါးစပ်ကဆို အာပုပ်စော် နံတယ်လို့ အပြောခံရမဲ့ အတူတူ။ ဘာလို့ဆိုတော့ သွားမတိုက်ရတာ ကြာပြီလေ။

(အဆိုပါ “ဂျိမ်း..” ဆိုသော အသံနဲ့အတူ အခန်တံခါး ပွင့်လာပြီး အစောင့်စစ်သား နှစ်ယောက်မှ နေနတ်နွယ်အား ဒလကြမ်း ဆွဲခေါ်လာကာ အခန်းတွင်းသို့ ဆောင့်ကန်သွင်းလိုက်စေ …။)

နေနတ်နွယ် ။ ။ “ အောင်မယ်ငီးဗျ..။ အောင်မငီး ..၊ ခွေးသား ၀က်မြေး.. လဒတူ လဒူတတဲ့ ကျီးကန်း ယောက်ဖတွေ၊ မင်းတို့ကို ကမ္ဘာ မကြေဘူး။ ငါ ကျောက်ဆည်သားကွ။ အောင်မယ်ငီးဗျာ .. နာလိုက်တာ .. ”

မောင်ဒိုင်း ။ ။ “ ဟဲ ဟဲ .. အဖေါ်ရပြီ။ နေပါဦး စကားမစပ် .. နင်က သတ္တိတယ်ကောင်းပါလား။ စစ်ခွေးတွေကို ပြန်ဆဲရဲတယ် ဆိုတာ နဲနဲနောနော နီတဲ့ သွေးမဟုတ်ဘူး..။ ”

နေနတ်နွယ် ။ ။ “ ခင်ဗျား မကြားဖူး ဘူးလား။ ကျောက်ဆည်သားတွေ သွေးဘယ်လောက် နီတယ်ဆိုတာ။ ပြီးခဲ့တဲ့ ၂၀၀၇ တုန်းက ဘုန်းကြီးတွေကို သေနတ်နဲ့ ပစ်သတ်တဲ့ အခု တပ်ချုပ်ကြီးဟာ ကျုပ်တို့ ကျောက်ဆည်သားဗျ ..။ သတ္တိကတော့ မသေးဘူး၊ ဒါပေမယ့် ဗျာ.. ခုဟာက လက်ရောခြေပါ ကြိုးနဲ့တုပ်ထားပြီးမှ ရိုက်ရဲတာကို ကျုပ်အခံရခက်သဗျ .. ဟင်း ဟင်း .. ခွေးသား ၀က်မြေး.. လဒတူ လဒူတ၊ ကျီးကန်း ယောက်ဖ၊ လဗြောင်ကွပ်တွေ… မင်းတို့ကို ကမ္ဘာမကြေဘူး။ ငါကျောက်ဆည်သားကွ။ .. ”

မောင်ဒိုင်း ။ ။ “ ဟာ .. တော် .. တော် ..၊ သိပြီးသား။ နင်မှ မဟုတ်ဘူးဟေ့။ ငါလဲ ခံရဖူးတာဘဲ။ ဒီမှာငါနေတာ နင့်ထက် စောတယ် ကိုယ့်လူ ..၊ ငါက .. လွတ်ရာ လွတ်ကြောင်း .. ဘုရား တရားလေး လုပ်မလားလို့ .. အချိန် ကောင်း ရွေးနေတာ၊ နင်ကတမှောင့် .. ”

နေနတ်နွယ် ။ ။ “ တွေးတွေးပြီး .. မခံချင်လွန်းလို့ပါ အကိုရာ .. ”

မောင်ဒိုင်း ။ ။ “ အတူတူပါဘဲ ဆရာလေးရာ ..၊ ငါ့တုန်းကလည်း နင့်လိုဘဲ။ ဒီထဲလာတုန်းက စိုင်းစိုင်းခမ်းလှိုင်လို ဟစ်ဟော့နဲ့ ၀င်လာတာ မဟုတ်ရပါဘူး မောင်ရ။ ဒါနဲ့ .. ဆိုပါဦး နင့်နာမည် လေးနဲ့ အမှု အကြောင်းလေး။ ”

နေနတ်နွယ် ။ ။ “ ကျွန်တော့် နာမည်က နေနတ်နွယ်ပါ။ အမှုကတော့ န၀လတ် .. လတ် .. လတ် .. ”

မောင်ဒိုင်း ။ ။ “ ဟ .. နင့် အမှုက အဆီ တ၀င်းဝင်းနဲ့ပါလားဟ။ ဗိုလ်ချုပ် ချွေးမလောင်းလေးကိုမှ သွားကမြင်းရသလား .. ”

နေနတ်နွယ် ။ ။ “ ဟာဗျာ .. ခင်ဗျားကလည်း .. ပိန်းလိုက်တာ။ ကျွန်တော်က ဘာလုပ်ရမှာတုန်းသူ့ကို သဲတရှပ်ရှပ်နဲ့ဟာ။ .. ကလိ ချင်း ကလိရင် သူ့ထက်ဝင်းတဲ့ အဆီလေး တွေ ..(အဲလေ) နောက် ပေါက်လေးတွေကို ကလိမှာပေါ့ ..၊ ဟာ..ဟုတ်ပါဘူး .. ဖွ ..ဖွ။ ကျွန်တော် ဇာတ်ညွှန်းတွေ ကဗျာတွေဘဲ ရေးပါတယ်၊ ဒါမျိုးတွေ မလုပ်ပါဘူးဗျာ။ ခုတော့ ဆေးမှုတဲ့ .. အောင်မယ်ငီးဗျာ။ ခွေးသားဝက်မြေး.. လဗြောင်ကွပ်တွေ … ”

မောင်ဒိုင်း ။ ။ “ ဟာ .. ဟကောင် တိုးတိုးလုပ်ဟ၊ နင်ပြောတာ အကုန်လုံး ဟိုက နားထောင်နေတာ။ ပီညဲရိုးတောင် လွတ်တာ မဟုတ်ဘူးဟေ့။ ဟိုလူက ခပ်တည်တည် ပြန်ထွက်သွားလို့ ရတယ်။ မင်းတို့ ငါတို့က အထွက်မရှိဘူး။ အ၀င်ဘဲ ရှိတယ်။ ဒီထက်လုံခြုံတဲ့ တိုက်ထဲဘဲ သွားနေရမှာ ..စိတ် လျှော့ .. စိတ်လျှော့ .. ”

နေနတ်နွယ် ။ ။ “ ကျွန်တော်ဗျာ .. အဲဒီလောကကြီးထဲ ရောက်တာ မကြာသေးပါဘူး။ အနုပညာ ဆိုတာကို အမေ့ ဗိုက်ထဲကတည်းက ရင်ခုန်ရလွန်းတဲ့ သူမို့ ဘ၀တွေနာ၊ မျက်နှာငယ်ရတဲ့ အကြိမ်ပေါင်း များစွာ ရင်ဆိုင်ပြီးမှ ဒီ .. ကဗျာဆရာ၊ ဇာတ်ညွှန်းရေး ဆရာဆိုတဲ့ ဘ၀ကို ခုံမင်ရူးသွပ်၊ နှစ်သက် မြတ်နိုးခြင်း ကြီးစွာနဲ့ ရောက် ရောက် … ”

မောင်းဒိုင်း ။ ။ “ တော်ပါတော့။ နင့်ဟာက ဂျာနယ်အင်တာဗျူးတွေ ဖတ်နေရသလိုဘဲ။ လိုရင်းပြော၊ နင်တကယ် ဆေးချလို့လား။ .. ”

နေနတ်နွယ် ။ ။ “ ဟာ .. မဟုတ်ရပါဘူးဗျာ။ ပြောပြီးပါပြီ။ ကျွန်တော် ဒါတွေကို မလုပ်တတ်ပါဘူး။ လုပ်ဖို့လည်း လွယ်သလား အကိုရ။ ဒီလောက် ငွေသောင်းချီ၊ သိန်းချီ တန်တဲ့ဟာတွေ..၊ ကျွန်တော်တို့လို ပါမွှားတွေက ဘယ်နှယ့်လုပ် သုံးနိုင်ပါ့မလဲ။ သုံးချင်တောင် ရေမလျှံရင် မဖြစ်နိုင်ဘူးဆိုတာ အကိုသိမှာပါဗျာ .. ။ ”

မောင်ဒိုင်း ။ ။ “ အင်း .. ဒါလည်း ဟုတ်တာဘဲ။ ဒါဆို နင်က ဘယ်လိုဖြစ်ပြီး …. ”

နေနတ်နွယ် ။ ။ “ ဒီလိုဗျ .. မနေ့က ' မေ့အီးကို မောင်ရှူပါ့မယ် ' ဆိုတဲ့ ရုပ်ရှင် ရိုက်ကွင်းတစ်ခုမှာ ကျွန်တော်လည်း ရှိနေတယ်ဗျ။ ဒါရိုက်တာက မောင်လူမော် (ရေတွင်းပျက်) ပေါ့။ ဇာတ်ညွှန်းက ကျွန်တော် ရေးတာလေ။ မင်းသမီးက ခုနကပြောတဲ့ ချွေးမ အလောင်းတော် န၀လတ်။ ဖြစ်ချင်တော့ .. ရိုက်ကွင်း ခဏနားတုန်း ကျွန်တော်က အပေါ့သွားတာ၊ မင်းသမီး အ၀တ်လဲတဲ့ အခန်းဘေး ရောက်နေမှန်း မသိလိုက်ဘူး။ ဖာသိ ဖာသာဘဲဗျ။ ကိစ္စပြီးလို့ ရိုက်ကွင်း ပြန်ရောက်တော့ .. အောင်မယ်ငေးဗျာ …. ခွေးသား ၀က်မြေး .. လဗြောင် ကွပ်တွေ … တွေ .. ”

မောင်ဒိုင်း ။ ။ “ သြော် .. အရေးထဲ လဗြောင်မကွပ်ဘဲ ပြောစမ်းပါ ဆရာရယ် .. ”

နေနတ်နွယ် ။ ။ “ အင်းဗျာ .. မခံစားနိုင်လွန်းလို့ပါ အကိုရာ .. ဒီလဗြောင်ကွပ်တွေ ဆိုတာ မင်းသမီးရဲ့လင်လောင်းက သူ့မယား လောင်းလေး အတွက် လုံခြုံရေး ပေးထားတဲ့ ကိုယ်ရံတော်တွေ ဆိုဘဲဗျ။ ကုန်းကုန်းကွကွ လုပ်မိတဲ့ ကျွန်တော့်ကို အတင်းဆွဲချုပ်ပြီး ဆေးထုပ် ပျောက်မှု၊ ပြီးတော့ ဆေးချမှုနဲ့ ဖမ်းရော .. ဒီလိုနဲ့ ရောက်လာတာဗျာ.. အီး .. ဟီး .. ဟီး … ”

မောင်ဒိုင်း ။ ။ “ နင် .. မသုံးဘူးဆို .. ဘယ်လိုလုပ် ဖမ်းလို့ရမလဲဟ .. ”

နေနတ်နွယ် ။ ။ “ အဲဒါ ပြောတာပေါ့။ လဗြောင်ကွပ်တွေ ဆိုတာ..။ ကျွန်တော်လည်း ကံကိုက မကောင်းတာမျိုးဗျ။ ရိုက်ကွင်းမယ် ဘောင်းဘီအိတ်ထဲ ကုလား ကွမ်းထုပ်လေး နှစ်ထုပ် ထည့်ထားမိပါတယ်။ ဒါကို ဆေးထုပ် ဆိုပြီး ဆွဲစိလိုက်တာပါဘဲ အကိုရာ … အောင် မယ်ငီး .. ဟီး ဟီး .. ဆေးမှုတဲ့ ဗျာ..၊ ခွေးသား ၀က်မြေး .. လဗြောင်ကွပ်တွေ … တွေ .. ”

မောင်ဒိုင်း ။ ။ “ အင်း .. အမှုတွဲကတော့ ရှုပ်လာပြီ ကိုနှင်းမောင်ရေ။ .. အဲလေ .. ငါ နားမလည်ဘူး။ ဘာလဲဟ … ကုလား ကွမ်းထုပ် ဆိုတာ ..”

နေနတ်နွယ် ။ ။ “ ဗမာကွမ်း မဟုတ်လို့ပေါ့ဗျ။ အိန္ဒိယက လာတဲ့ ready made အခြောက် ထုပ်လေးတွေဗျာ။ မေမြို့ဘက်မှာ ပေါတယ်။ ကျွန်တော်ဟိုတစ်ခါ ရုပ်ရှင် အဖွဲ့နဲ့ လိုက်သွားတုန်းက ၀ယ်လာတာ။ ဗမာကွမ်းလို သွားတွေ၊ ခံတွင်းတွေ မညစ်ပတ်ဘူး ဆိုပါတော့ .. ။ ”

မောင်ဒိုင်း ။ ။ “ အင်း .. နင်တို့ ဟာကလည်း ရှင်းကို မနိုင်တော့ဘူး။ ဒါပေမယ့် .. အမှုမှန် ပေါ်ရင်တော့ သေချာပေါက် လွတ်မှာပါ။ နောင် နှစ်အစိတ်လောက်ပေါ့ .. ။”

နေနတ်နွယ် ။ ။ “ ဗျာ …၊ အောင်မယ်ငေးဗျာ .. ”

(သူတို့ နှစ်ယောက် စကားပြောနေစဉ်မှာပင် အစောင့် စစ်သားနှစ်ဦးက နာမည်ကြီး ပုဝါမကူ ရေမရှူ ဟစ်ဟော့ သီဆိုသူ တော်ကီသော်အား ဆွဲခေါ်လာပြီး နေနတ်နွယ် တုန်းကကဲ့သို့ ယဉ်ကျေး၊ နူးညံ့စွာဖြင့်ပင် ကန်သွင်းစေ..။)

မောင်ဒိုင်း ။ ။ “ ဟာ..ဟ .. ကိုယ့်လူကိုတွေ့ ဖူးတယ်မှတ်တယ်၊ လက်သပ်စတော့ .. အဲလေ .. လက်စသပ်တော့ ရွက်ဆစ် အဖွဲ့က ဗမာ့ ဟစ်ဟော့ပါ မီဂါ ပိုင်အိုနီးယားကြီးဘဲ၊ ဘယ့်နှယ်ကနေ ဘယ်လိုတွေ ဖြစ်လာတာတုန်းဗျာ .. လင်းပါဦး .. ”


တော်ကီသော် ။ ။ “ ဟစ်ဟော့ပါတွေ ကင်းဘလော့ဂါတွေ နောက်မှ ပြောဗျာ ..။ ခင်ဗျားကို ကျုပ်သိပါတယ်။ သိသလိုလို မသိသလိုလို ဖြစ်နေတာက ဟောဟိုကလူကြီးဘဲ။ နေနတ်နွယ်ဆိုတာ သူလား .. ”

နေနတ်နွယ် ။ ။ “ ဟုတ်ပါတယ် ..၊ ကျွန်တော် ကဗျာဆရာ ဇာတ်ညွှန်းဆရာ နွေနွပ်နယ် .. ဟာ .. မှားလို့ နေနတ်နွယ်ပါ ။ ”

တော်ကီသော် ။ ။ “ သေချာပြီ သေချာပြီ ..၊ ခင်ဗျားကို နာမည်ဘဲ ကြားဖူးတာ၊ ခုတွေ့ရတော့ ပိုဆိုးပါလား။ ခင်ဗျားက ခင်ဗျား ဘောင်းဘီထဲက မိတဲ့ ဆေးထုပ်ကို ကျွန်တော်မျိုး ဟစ်ဟော့ပါ တော်ကီသော် ဆီကနေ ငွေငါးသိန်းနဲ့ ၀ယ်ခဲ့တာဆို ..၊ လုပ်ပါဦး ..၊ ခင်ဗျားနဲ့ ကျွန်တော် တစ်လောကတည်းသားတွေဗျာ။ ကျွန်တော်လည်း ဘယ်တုန်းကမှ ဒါတွေ အရောင်းအ၀ယ် မလုပ်ရပါဘူး။ လူချင်းတောင် ခုမှတွေ့ဖူးတာ..”

မောင်ဒိုင်း ။ ။ “ ဇာတ်က ခုနကထက်ကို ပိုရှုပ်လာပါလား .. ”

နေနတ်နွယ် ။ ။ “ မရှုပ်ရပါဘူးဗျာ၊ ဒီအဆိုတော်လေး ကျွန်တော့်ကို မသိဘူးဆိုတာလည်း မှန်ပါတယ်။ မနေ့က စစ်ကြောရေးမှာ ကျွန်တော့်ရှိသမျှ အမွှေးတွေ အကုန် ဆွဲနှုတ်စစ်၊ တွေ့တဲ့ နေရာတွေကို ရိုက်စစ်ပြီး၊ ဒီဆေးကို ကျွန်တော် သုံးတယ်၊ ၀ယ်တယ်လို့ အတင်း ၀န်ခံခိုင်းတာ မခံနိုင်တဲ့အဆုံး ကျွန်တော့်ကို ထမင်းပုံကျွေးတဲ့ ဂျာနယ်ထဲက သူ့ live show က ပုံတွေ့ပြီး တော်ကီသော် ဆီက.. လို့ ပြောမိ ပြောရာ ထွက်သွားတာပါ … မခံနိုင်လွန်းလို့ပါ မိတ်ဆွေတို့ရာ။ ဒီ အဆိုတော်လေးဆီက ကျွန်တော် ၀ယ်ခဲ့တာလည်း မဟုတ်ပါဘူး။ ပြော ပြီးပါကော။ ကုလားကွမ်းပါ ဆိုနေမှ .. ။ အောင်မယ်ငေး .. ဆေးမှု တဲ့ဗျာ … ခွေးသား ၀က် မြေး .. လဗြောင်ကွပ်တွေ … တွေ .. .. ”

တော်ကီသော် ။ ။ “ ဒီတစ်ခါ.. ငါလည်း အော်သင့်ပြီပေါ့။ အောင်မယ်လေးဗျာ .. ဆေးမှုတဲ့ .. ခွေးသား ၀က်မြေး .. လဒေါင်ကတွေ .. ”

မောင်ဒိုင်း ။ ။ “ သြော် .. သြော် .. ခုမှဘဲ ဇာတ်ရည် လည်တော့တယ် .. အဆိုတော်လေးလည်း လွတ်မှာပါ၊ ဒီမိုကရေစီရရင် .. ”

တော်ကီသော် ။ ။ “ ဟမ် .. ဒီမိုကရေစီရမှ ? .. တော် .. တော်၊ ကျွန်တော် တရားသူကြီးကို ထောင်ဒဏ် တစ်သက်တစ်ကျွန်း ပြောင်း ပေးပါ လို့ဘဲ လျှောက်တော့မယ်ဗျာ။ အစ် .. အစ် .. ဒီပုံနဲ့ဆို တစ်သက် တစ်ကျွန်းကမှ ခွေးသား ၀က်မြေးတွေ စားခွက်လုချိန် လွတ်ကောင်း လွတ်နိုင်မယ်။ ဒီမိုကရေစီ ဆိုတာကတော့ ဒီတစ်သက်မှာ နအဖဆီကရော အတိုက်အခံ ဒီမိုကရေစီ လှုပ်ရှားသူတွေဆီကရော..၊ ရလမ်းမမြင် … ။ အောင် မယ်လေးဗျာ .. ဘ၀ .. ဘ၀ .. .. ဆေးမှုတဲ့ .. ခွေးသား ၀က်မြေး .. လဗြောင်ကွပ်တွေ .. ”


(တံခါး ထပ်ပွင့်လာပြီး အစောင့် စစ်သားနှစ်ယောက်မှ အဖြူရင့်ရင့် အဆင့်မြင့် သိုင်းပညာရှင် စွန်းပုည၀ုကျိအား သေနတ်ဖြင့် ဂရုတစိုက် ထိုးချိန်လျက် အခန်းတွင်းသို့ ကန်သွင်းလိုက်စေ .. သိုင်းဆရာကြီးမှာ အတွင်းအား ကုန်ခမ်းနေပုံရပြီး ပျော့ခွေလျက်ရှိစေ)

မောင်ဒိုင်း ။ ။ “ တရုတ်တွေပါ ထောင်ထဲ ထည့်တဲ့ခေတ်ရောက်ပလားဟ .. ဘုရား .. ဘုရား .. ငါမျက်စိများ မှားမိလေသလား .. ”

တော်ကီသော် ။ ။ “ မမှားပါဘူး ကိုဒိုင်းရာ .. ကျွန်တော်လည်း ဟိုလူ့ကို ပြောသာပြောနေ။ ကြံရာမရတဲ့ အဆုံး လွတ်လိုလွတ်ငြား သူ့ ပါဆွဲခေါ်လာရတာ .. ။ ”

မောင်ဒိုင်း ။ ။ “ ပြန်ရှုပ်သွားပြန်ပေါ့ .. ”

တော်ကီသော် ။ ။ “ အေးဗျာ .. ဘုရား အလှူခံသေတ္တာထဲ ရောက်တဲ့ ပိုက်ဆံကမှ အပြင် ပြန်ရောက်ရင် ရောက်ဦးမယ်။ ဘိုချုပ်တွေရဲ့ အိတ်ထဲ ရောက်တဲ့ ဒေါ်လာနဲ့ အင်းစိန်ကို ရောက်တဲ့ လူတွေဟာ ဆိုရင်ဖြင့် တော်ရုံနဲ့ ပြန်လွတ်နိုင်မယ် မထင်လို့ပါ။ စွန်းပုည၀ုကျိကို လူချင်း သိပ်မခင်ပါဘူးဗျာ။ ကျွန်တော် တရုတ်နယ်စပ် ဂီတပွဲ ဖျော်ဖြေဖို့ သွားတုန်း ကြားဖူးတာပါ။ အဲဒီတုန်းက သူက ဘလော့ဂါ လဥရှောင် ရွေးပွဲအတွက် ရှမ်းရိုးမတခွင်မှာ သိုင်းလေ့ကျင့် နေတယ်ဆိုဘဲ။ စစ်ကြောရေးက အင်မတန် နှိပ်စက်တာနဲ့၊ ပြီးတော့ သူ့အရည်အချင်းနဲ့ ဆိုရင် ကျွန်တော်တို့ ဒီထောင်နံရံကို ကိုယ်ဖေါ့ပြီး ခုန်ပြေးနိုင်တဲ့ နည်းလေးတွေ ရလိုရငြား ဆိုပါတော့ … ”

နေနတ်နွယ် ။ ။ “ ဒါနဲ့များ ခင်ဗျားက ကျွန်တော့်ကို ပြောသေးနော် .. ။ သူ မသာ ကိုယ်ရေဝေးပါဘဲ။ အောင်မယ်ငေး … နေနတ်နွယ် ဆေးအမှုတွဲ ရှုပ်ကုန်ပြီခင်ဗျ..”


(စကားဝိုင်း ကောင်းဆဲမှာပင် မြန်မာပြည်၏ နာမည်ကြီး ခေတ်လွန် ဟိုက်ပါ ဒါရိုက်တာ မောင်လူမော် (ရေတွင်းပျက်) အား စစ်သားနှစ်ဦး မှ ဆွဲခေါ်လာပြီး ထုံးစံမပျက် ဆောင့်ကန် ထည့်စေ .. )

မောင်ဒိုင်း ။ ။ “ ရှုပ်သထက်ကို ရှုပ်လာပြီဟေ့ ..၊ အပြင်က ဗမာ့နိုင်ငံရေးအဖွဲ့တွေ ဒီမိုအရေး ကြိုးစားတာထက်ကို ခက်ခဲနက်နဲလွန်းပေါ့။ ကဲ .. ပြောစမ်းပါဦး မောင်လူမော်၊ ခင်ဗျားကကော ဘယ်နှယ့်လုပ် ဒီချီးထုပ်တွေကြား ပါလာရ ပြန်တာတုန်း .. ”

မောင်လူမော် (ရေတွင်းပျက်) ။ ။ “ တောက် .. ပြောမနေပါနဲ့တော့ဗျာ။ ဒါရိုက်ချာ ငှက်ကြီးဝန်ပို မောင်မောင်လို မျက်နှာသာ အပေး ခံရမလားဆိုပြီး ယတြာ ချေတဲ့အနေနဲ့ ဘိန်းစား ကားလေး တစ်ကား ရိုက်မိပါတယ်။ အကယ်ဒမီလေး တစ်ခု ပေးပြီးတော့၊ အချင်းချင်းတွေ မျက်နှာကိုမှ မထောက်နိုင်ကြဘူး..။ လုပ်ရက်ကြတယ်။ ဟင် .. သြော်.. စွန်းပုည၀ုကျိလည်း ရောက်နေသကိုး။ ရက်စက်လိုက်တာ သိုင်းဆရာရယ်။ ခင်ဗျား လုပ်မှဘဲ ကျွန်တော် ကက်ကင်းမိပြီး ဆေးမှုနဲ့ အဖမ်း ခံရရော .. ”

နေနတ်နွယ် ။ ။ “ အင်း ..သိုင်းဆရာက အဝေးရောက် အတွင်းအားနဲ့ ဆွဲခ်ါလာတယ်တော့ မထင် ပေါင်။ ကျွန်တော်တို့လိုဘဲ ကြံမိကြံရာဖြစ်သွားပုံရတယ်။ အေးလေ..ခင်ဗျားကလည်း..ဟိုဝန်စိမ်း၊ ဒီ ၀န်စိမ်းတွေနဲ့ ပိုင်သကိုး ….. ”

စွန်းပုည၀ုကျိ ။ ။ “ (ဖြေလျော့ခွေ အနေအထားဖြင့်) ကျုပ် သိပြီးသားပါ။ ခု .. ကျုပ် ရှော့အရိုက် ခံထားရတယ်။ အတွင်းအား ပြန်ပြည့်ရင် ခင်ဗျားတို့ အားလုံး နာမယ်မှတ်။ ကျုပ်က ဗို့အပြည့် အတွက်ပဲ အတွင်းအား လေ့ကျင့်ထားတာ။ မနေ့က စစ်ကြောရေးမှာ ဗို့အား မပြည့်တဲ့ ရှော့နဲ့ ညားလိုက်လို့ ခု ဘယ်လိုဖြစ်နေလဲ မသိဘူးဗျာ။ ခံရခက်ကြီး .. အား .. ကျွတ် .. ကျွတ် .. ကျွတ် .. ”

မောင်လူမော် (ရေတွင်းပျက်) ။ ။ “ အင်းဗျာ .. ကျွန်တော့်ကို ခင်ဗျား ပိုင်တဲ့ ကီးဘုတ် လက်တင် စင်္ကြာရှင် သိုင်းနဲ့တော့ပြန်မချပါနဲ့။ ကျွန်တော်လည်း ခင်ဗျားကို ပေါ်လစီကားအတွက်ရိုက်ပေးဖို့ ၀န် ကြီးကို ဘယ်တော့မှ မပြောတော့ပါဘူး။ ခုတလော ဗမာဘလော့တွေမှာ သိုင်းချပွဲတွေ ဆက်နေလို့ ကြောက်နေရတယ်ဗျာ။ ခင်ဗျားနဲ့ ဘ၀တူတွေပါ။ ကျွန်တော်တို့ ခုတလော အလုပ် အရမ်းရှုပ် နေတာ။ ရိုက်လက်စတွေက မနဲဘူးဗျ၊ ခုတော့ ဘယ်လို ဆက်စခန်းသွားရမလဲ မသိတော့ဘူး။ ”

မောင်ဒိုင်း ။ ။ “ ဒီအထဲမှာ ဆက်ရိုက်ပေါ့ ဒါရိုက်တာကြီးရယ် .. ခင်ဗျားက ဖန်စီကားလေးတွေ အရိုက် ကောင်းတာဘဲ။ ဟို မင်းသမီးလေး 'နာနာကိုင်' ကို ခေါ်ရိုက်ပါလား။ ကားနာမယ်ကို ဒီလိုပေးဗျာ။ ' ဆံပင်အရှိ .. လင်အစိ' တို့ .. ' လင်ပေါင်းတစ်ထောင် (F) င် ပေါင်း ချောင် ' တို့ … ။ ဒီထောင်ထဲမှာဆို ကွက်တိဘဲ ဆရာ .. ။ အပြင်မင်းသား သိန်းချီပေးပြီး ငှားစရာမလိုဘူး။ ၀န် ကြီးဆီလည်း တင်ပြစရာ မလိုဘူး။ ကျွန်တော်တို့ နိုင်ငံရေးသမားတွေကလွဲရင် အားလုံး မေတ္တာဖြင့် ကူညီရိုက်ပေးမဲ့ လူတွေချည်း .. ချည်း .. ။ ”

မောင်လူမော် (ရေတွင်းပျက်) ။ ။ “ ဟာဗျာ .. တော်ပါပြီ။ အခန့်မသင့်ရင် ကက်ကင်း ထပ်မိပြီး၊ ကျွန်တော့် ဘ၀ပါ “ လင်ပေါင်း တစ်သောင်း (F) င် ဟောင်းလောင်း ” ဖြစ်သွားနိုင်တယ်။ အမ်မယ်လေး .. ကလူ..ကလူ .. ။ အခု ဒီသိုင်းဆရာက ကျွန်တော် ရိုက်နေတဲ့ ပြန်ကြားရေး ၀န် ကြီးဌာနအတွက် “ ကျော်ကျော့် ပါးစပ်ပြဲ သောက်ရှက်နဲ ” ဆိုတဲ့ နိုင်ငံချော်ကားအတွက် .. တောင်း တောင်း ပန်ပန်နဲ့ အကူအညီ တောင်းထားရတဲ့ လေသိုင်း နည်းပြဗျ။ အဆိုတော် တော်ကီသော် ထောက်ခံလို့ ၀န်ကြီးအမိန့်နဲ့ ငှားလိုက်တာဗျာ။ သူ့ကို စစ်ခွေးတွေ ဆွဲတော့ ကျွန်တော့်ဆီက ဆေး ၀ယ်သုံးတာလို့ ဖြောင့်ချက် ပေးသတဲ့ ..၊ အောင်မယ်လေး .. အရပ်ကတို့ .. ကယ်ပါ၊ ဆေးဆိုလို့ ပခုက္ကူက ဆေးရွက်ကြီးတောင် ကွမ်းယာထဲ ထည့်မငုံပါဘူးဗျာ။ ခုဖြင့် .. ဆေးမှုတဲ့ ..၊ သားသားလူမော်က ခန့်ခန့်လေးပါဗျ .. ဟီး ဟီး ဟီး .. အစ် အစ် အစ် … ”

တော်ကီသော် ။ ။ “ ငိုမနေပါနဲ့တော့ ကိုလူမော်ရယ်၊ ရေတစ်တွင်းပျက်ရင် နောက်တစ်တွင်း ထပ်တူးကြတာပေါ့။ … ”

(စကားပြောကောင်းတုန်း အစောင့် စစ်သား နှစ်ယောက်မှာ ပြည်ထောင်စု ယိုင်နဲ့ရေးနှင့် ကြုံလှီ ဖွတ်တက်ရေး အဖွဲ့ချုပ် နာယကကြီး ဦးပြောင်ရှည်အား ဒရွတ်တိုက် ဆွဲခေါ်လာပြီးသကာလ အရင့်အရင် ပုဂ္ဂိုလ်များနဲ့ မတူ ထူးခြားစွာ ပိတ်ပက် ဆောင့်ဆွဲလျက်၊ အခန်းတွင်း ကန်သွင်းတော် မူကြစေ..။)

ဦးပြောင်ရှည် ။ ။ “ အောင်မယ်လေးဗျ .. အောင်မယ်လေးဗျ .. မိုက်ရိုင်း ထွားကျိုင်းလိုက်တာ။ ဟင် .. ကိုယ့် အချင်းချင်းတွေကို နဲနဲ လေးမှ မညှာတာကြဘူး။ ငါ .. နာယက .. လ .. ထောက် ဂျုပ်ကွ .. ဟင်း ဟင်း … မင်းတို့တွေ တွေ့မယ် … ”

မောင်လူမော် (ရေတွင်းပျက်) ။ ။ “ အဘ .. ရောက်လာတယ်နော် .. ၀မ်းသာလိုက်တာဗျာ .. ”

ဦးပြောင်ရှည် ။ ။ “ ဟင် .. လူမော် .. ရေတွင်းပျက် ..၊ ၀မ်းသာတယ်ဟုတ်စ၊ မင်းဟာ ကိုယ်မွေးတဲ့မျောက် ကိုယ့်ပြန်ချောက်တယ် ပေါ့၊ ဟုတ်လားဟင် .. ရက်စက်ပါပေ့ လူမော်ရယ် .. လုပ်ရက်လိုက်တာ .. ။ ”

မောင်လူမော် (ရေတွင်းပျက်) ။ ။ “ ခွင့်လွှတ်ပါ အဘရယ် ..၊ ဒီလိုနေရာ ရောက်တော့မှ ကျွန်တော့်ကို ဒီလို မပြောပါနဲ့တော့ဗျာ။ ကျွန်တော်လည်း ကြံမိကြံရာ ဖြစ်သွားရတာပါ။ ဘဘ ကယ်မှဘဲ … ဟို ရိုက်လက်စလေး တွေ .. တွေ .. ”

ဦးပြောင်ရှည် ။ ။ “ တော် .. တော် .. ဘာမှ ရိုက်လက်မစနဲ့တော့ ..၊ ဒီပုံစံနဲ့တော့၊ ကိုယ်ရိုက်ရမယ် မမှတ်နဲ့၊ မင်းဘဲ အရိုက် ခံဖို့ ပြင် ထားဟေ့ ..၊ ဘယ်နှယ့်ကွာ။ ဆေးအရောင်းအ၀ယ် လုပ်တာများ၊ ငါ နာယက ပါမစ်နဲ့ လုပ်သလေး ဘာလေး၊ မင်းမို့ အကြံထွက်တယ်။ မင့်ဘာသာမင်း ကြည့်ကျက် လွှဲပြောပါလား။ နောက်က ငါမရ အရ လိုက်ရှင်းမှာပေါ့။ ခု .. ငါပါ ပါပြီ။ ဟင် .. ငါဖြစ်တော့ ဘယ်သူက လိုက်ရှင်းမှာတုန်း …၊ အမယ်မင်း .. ကယ်တော် မူကြပါ … ။ ”

(ထိုစဉ်မှာဘဲ .. အစောင့်စစ်သား နှစ်ဦးမှနေ၍ ထောက်လှမ်းဗြုတ်လျှာရှည်အား မျက်စိကို အ၀တ်စ စည်းလျက်သားပုံစံဖြင့် ဆွဲခေါ်လာကာ ပါး၊ နား၊ နဘမ် အီစလံဝေအောင် ပိတ်ကျင်းလျက်၊ အခန်းတွင်းသို့ (F) င် အား ဆောင့်ကန်သွင်းစေ။)

မောင်ဒိုင်း ။ ။ “ ဟော .. ဒီတစ်ခါ အလှည့်ကျသူက မမြင်မကန်း၊ မထူးဆန်းတဲ့ ချည်သား မျက်မှန် အနက်လေးနဲ့ပါလား ..၊ လုပ်စမ်းပါဦး။ ခင်ဗျားကကောဘာမှုလဲ။ ဒီနေ့ လူစည်တယ်။ ၀ိုင်းလုပ် ရမလား။ အလှူ လုပ်ရမလား .. ။ ”

လျှာရှည် ။ ။ “ ဘာမှ လုပ်မနေနဲ့တော့.. မျက်စေ့ ကျိန်းရတဲ့အထဲ။ သြော် .. ဦးပြောင်ရှည် .. ဦးပြောင်ရှည် ..၊ ထင်သားဘဲ ..၊ ခင်ဗျား ရောက်နှင့်ပြီး ဆိုတာ .. ဘာလို့ အဲသလောက်တောင် ကျုပ်ကို ရက်စက်ရတာလဲဗျာ .. ခုတော့ ကျော်မကောင်း ကြားမကောင်း၊ ကျုပ် ၀ဋ်လည်ပြီ ထင်တယ်.. ”

ပြောင်ရှည် ။ ။ “ အင်းဗျာ .. ၊ ကျုပ်လဲ မတတ်သာလွန်းလို့ သက်သာမလား ဆွဲထည့်မိတာပါ။ ခင်ဗျား ပါလာရင် ခင်ဗျား အဖေကြီး အရှိန်နဲ့ လွတ်မလား တွေးမိပြီး ထောက်လှမ်းရေး ရံပုံငွေ အတွက် လုပ်မိတာပါလို့ ထွက်ချက် ပေးမိသဗျာ .. ။ ”

လျှာရှည် ။ ။ “ အောင်မယ်လေးရယ်တဲ့ .. အေးမယ်လောင်။ ကိုယ်တို့ကောင် လျှာရှည်ကြီး .. ဂန့်နင်းကီးတဲ့မောင် .. ။ ဟာ .. ရှုပ်ကုန် ပြီ။ ရှုပ်ကုန်ပြီ။ ခင်ဗျား ပြောတဲ့ အဖေကြီး မို့လို့ကို ရှုပ်ကုန်တာဗျို့။ ဟီး ဟီး .. ရွှတ်..။ ကျုပ်လည်း ကြိုးစားပါသေးတယ်ဗျာ .. ။ ဟို ကောင် တောင်ကျော်ခဲပစ် .. ဆိုတဲ့ ဘိုဂျုပ် ဂဲပစ်သား.. သူ .. သူ .. သူစတဲ့ဇာတ်။ အဖေကြီးမြေး “ မအေ ပေးလကောင် - နေရွှေသွေးအောင်” ပါ ပါကုန်တော့ ကျုပ်တို့လည်း တတ်နင်း မကီး နိုင်တော့ဘူး။ အဘိုးကြီး ဒေါသထွက်နေပြီ။ မင်းသမီး န၀လတ်ရဲ့ ပျောက်တဲ့ အထုပ်လည်း ပြန်တွေ့ပြီ။ အဖွက် လွန်ပြီး သူ့နိုင်လွန် ရေသဘင်ထဲက ပြန်ရတာ။ အထုပ်ကော န၀လတ်ကော ဂဲပစ်တဲ့ သားအဖတွေ ကော အခုလုံလုံ ခြုံခြုံဘဲ။ အမှန်က ခင်ဗျားတို့နဲ့လည်း ဆိုင်နင်း မကီးဘူး၊ ခင်ဗျားတို့ ချသလား၊ မလားဆိုတာ ခင်ဗျားတို့ အကန့်။ ဦးပြောင်ရှည် .. ခင်ဗျားက လိုင်းသပ်သပ်၊ ခုတော့ ယုန်ထောင် ရင်း ကြောင်ပါ မိနင်းကီးသွားတာ။ မတတ်နိုင်ဘူး။ ဒါပေမယ့် ခင်ဗျားတို့က တော်သေးတယ်။ ကျုပ်က ပိုခံရတာဗျ။ နာမယ်ကြီး ထမင်းငတ် တစ်လုံးမှလည်း ချရတာမဟုတ်ဘူး။ ထောက်လှမ်း ရေးဆိုတဲ့ အကောင်တွေက ဇာတ်တူသားချင်းဆို ပိုနွှာတာမျိုး။ အောင်မယ်လေး .. ကျုပ်တော့ မျိုးပါကန်းပြီ။ ဒီအထဲမှာ အသံဖမ်းစက်တွေ ရှိတယ်။ ခင်ဗျားတို့လည်း ဒီဘ၀ လွတ်တော့မှာ မဟုတ်ဘူး။ ဒါကြောင့် မထူးဘူးဗျာ။ ဆဲသာ ဆဲ .. ဟင် .. ခွေးသား ၀က်မြေး .. ခွေးသား ၀က် မြေး.. လဒတူလဒူတ၊ ကျီးကန်း ယောက်ဖတွေ၊ လဗြောင်ကွပ်.. လဗြွတ်ကောင်၊ လဖောင်ကွပ်.. လဖွတ်ကောင်တွေ။ ”


ဤတွင် ဆက်ရန် မသင့်တော်တော့သဖြင့် ကန့်လန့်ကာအား အမြန်ဆုံးနည်းသုံးကာ စူပါ ဟိုက်စပိ နှုန်းဖြင့် ချစေ။


PoFP နှင့် ပြောင်လျှာရှည်တို့မှ ဆရာကြေးမုံဦးသောင်း၏ “ဒေါ်နီနီမြင့်၏ ပုလဲသွယ်” ပြဇာတ်အား အခြေခံပြီး ရေးသားခြင်း ဖြစ်ပါသည်။